Тікелей бұйрықтың сол болғаны ма, әлде бас ал десе шаш алушылық па, әйтеуір өзбек дәрігерлері әйелдердің қалаған-қаламағанына қарап жатқан жоқ тәрізді. «Стерилизация жасау жөніндегі шараға мыңдаған дәрігерлер мен медбикелер қатысуда. Олар бала туу жасындағы келіншектерді, әсіресе екі баладан көп туған әйелдерді үгіттеуде», – деп жазды мақала авторы Мансур Мировалов.

2007 жылы БҰҰ-ның қинауға қарсы комитеті өзбек әйелдерін күштеп бала туу қабілетінен айыру және жыныс органдарын алып тастау оқиғалары жиі кездесетінін айтып, өзбек билігін сын тезіне алған болатын. Мұндай жағдай көбінесе баланы қарын жарып алған кезде жиі кездеседі. Осының кесірінен бала сүюден қалған кейбір өзбек әйелдерін күйеулері тастап кеткен.

Осыған бір мысал, Саодат Рахимбаева атты 24 жастағы келіншек наурыз айында өздігінен босана алмай, нәрестені хирургиялық жолмен дүниеге әкелген. Шала туылған Ибрагим көп ұзамай шетінеп кеткен. Сәбиін жер қойнына берген Саодат Рахимбаева біраз уақыт өткен соң операция кезінде хирургтың жатырының жартысын кесіп алып тастап, бедеу еткенін білген. Қайғы үстіне қайғы жамылған.

Ал дәрігерлер қауіпті ісіктің алдын алу үшін гистерэктомия жасауға мәжбүр болғанын айтып ақталады. Саодат Рахимбаева болса, тууды шектеу бағдарламасының құрбаны болдым деп есептейді.

«Менің рұқсатымды сұрамады, тексеру жүргізген де жоқ. Мені тілсіз мақұлықтай көріп, етімді кесіп, жарымжан етті. Ибрагиммен бірге неге өлмедім?» — деп зар жылайды жас келіншек. Перзентханадан шыққан соң Рахимбаева басындағы қайғысын күйеуіне айтқан. Күйеуінен қолдау күтіп, көзі жәудірей қараған келіншек одан безбүйректік көрем деп мүлде ойламаған-ды. «Адал жары» Саодатты әкесінің үйіне апарып тастап, жақында заң жүзінде ажырасатынын айтқан. «Ол (күйеуі – ред) дәрігерлердің не үшін былай істегенін сұраған да жоқ. Бәріне өзімді кінәлі етіп шығарды. Енді мен бала көтере алмаймын. Жұмысым да жоқ. Болашағым да жоқ», – деп күйінеді Рахимбаева.