23 шілде күні өткен төртінші шақырылған облыстық мәслихаттың ХХҮІІ сессиясында әкімдік әзірлеген 2010-2014 жылдарға арналған бала тууды ынталандыру жөніндегі «Ұрпақтар қоры» бағдарламасы қаралып, депутаттардың бірауыздан қолдауымен бекітілді. Бағдарламаның негізгі міндеттерінің ішінде бала туу көрсеткішін 1000 адамға шаққанда республика деңгейіне дейін көтеру (22,75), балаларды асырап алу арқылы өңірдегі жетімдікті қысқарту, ана мен бала өлім-жітімінің алдын алу, мектепке дейінгі мекемелер желісін кеңейту, оралмандардың көші-қонын арттыру сияқты өзекті мәселелер қамтылған. Аталмыш құжат төрт және одан да көп бала туатын отбасылар санын 2014 жылға қарай 1 мың отбасына жеткізуді көздеп отыр. Оны іске асыру жөніндегі шараларды жергілікті бюджет қаржысы есебінен қаржыландыру көлемі 3053,0 млн. теңгені құрайды. Бағдарламаға орай жыл аяғына дейін 176 отбасының 704 баласының, 2014 жылы 1 мың отбасының 4 мың баласының атаулы депозиттеріне ақша аударылатын болады. Бағдарлама биылғы қыркүйек айынан бастап 2014 жылдың желтоқсан айы аралығында жүзеге асырылады. Облыс әкімі Серік Біләловтің 1 шілдедегі қаулысы мен облыстық мәслихаттың 23 шілдедегі шешімі қол қойылған сәттен бастап қолданысқа енгізілді.