Олардың дені — ипотекалық несиесін төлей алмай, баспанасынан айырылып қалғандар, үйлерінің құрылысы аяқталмағандар және үлескер ретінде екі пәтерге ақша салып, соның екіншісін ала алмай жүргендер. «Баспана базынасымен талай жерге арызданып, одан еш нәтиже шықпаған соң, осындай қадамға барып отырмыз», — дейді аштық шарасына қатысушылар. Олар бұл әрекеттерін алдағы қазан айының 30-на дейін жалғастыратындарына нық сенімді. Өйткені дәл сол кезде Астанада ЕҚЫҰ мүше елдердің саммиті өтпек.

Ал Көкшетауда коммуналдық базарды жауып тастаған әкімдіктің шешіміне қарсы базар сатушылары аштыққа отырды. Қазір олардың саны 12 адамға жетті. Он бес жыл бойы бұл жерде көкөніс сатумен айналысып келген саудагерлер сауда орындарын қайтарып алғанша райынан қайтар емес. Ал қала әкімдігі сауда орны орналасқан көшеге жөндеу жұмыстарын жүргізуді жоспарлап отыр. Олар базар қызметкерлерінің бұған дейін бірнеше рет заңсыз наразылық шараларын ұйымдастырғанын айтады. Саудагерлермен бірнеше мәрте келіссөз жүргізілгенімен, еш нәтиже шықпаған.